وكالات//

فواحد المفاجأة ما كانتش فالحساب، خرج فستان العرس ديال ميليانيا ترامب، اللي لبساتو فالعرس ديالها مع الرئيس الميريكاني دونالد ترامب فـ 2005، للبيع على منصة “إيباي” وبثمن أقل بزاف من القيمة ديالو الأصلية.

الفستان المشهور هو من تصميم دار “كريستيان ديور” العالمية، وصممو جون غاليانو، وصاوبوه من قماش ساتان دوتشيس الفاخر بنسبة 300%، بتصميم ضيق كيبرز تفاصيل القوام، وكيكمل صاية واسعة على شكل حورية البحر.

وما يميز هذا الفستان أكثر هو الذيل الطويل ديالو، والمطرّز يدوي بكريستالات “سواروفسكي”، وهاد العمل استغرق أكثر من 550 ساعة.

حسب تقرير نشراتو الكاتبة ليانا ساتنشتاين على منصتها “نيفر وورنز” فـ “سابستاك”، صديقتها باتريشيا تورفالدز لقات الإعلان ديال الفستان بالصدفة وهي كتبحث على فساتين “ديور” قديمة من الثمانينات. الإعلان كان منشور من 21 يناير 2025، حسب ما وضحات هي.

البائع المجهول على موقع “إيباي” قال إنه شرا لاغوب من ميلانيا نفسها ف2010 بعد علاقة صداقة بيناتهم، وكان دفع 70 ألف دولار. اليوم، كيعرض الفستان للبيع مقابل 45 ألف دولار فقط، رغم أن ميلانيا كانت شراوتو بمبلغ 187 ألف دولار، حسب ما ذكر موقع “Women’s Wear Daily”.