عمـر المزيـن – مكتب الرباط//

بعد الغضب الواسع اللي خلفو الارتفاع ديال ثمن المازوط وليصانص، انخفضت هاد الأثمنة بشكل تدريجي لما بين 50 و60 سنتيم فعدد من المدن والمناطق المغربية، فالوقت اللي مزال فيه بعض الشركات كتبيع بثمن طالع بزاف.

وقال لحسن الداودي، الوزير المكلف بالحكامة، في تصريح لـ”كود”، أن الأغلبية ديال الشركات سيما لكبارين هبطو الاثمنة لـ60 سنتيم واستجابو لداكشي لي طلبات بيه الحكومة، مضيفا بالقول: “مشيت حتى لفاس ودرت زيارات بزاف ديال المحطات ودبا كولشي هبط والأغلبية دارو ستين سنتيم”.

وعلاقة بهاد الموضوع، علمت “كود”، أن الوزير الداودي غادي يدير لقاء خلال الأيام القليلة المقبلة مع أصحاب المحطات، بعدما رفضت هاد المحطات تخفيض الثمن ديال المحروقات بدون مبرر حق.