وكالات//

كشفت وثائق قضائية جديدة أن نجم المصارعة الحرة المعروف، هالك هوغان، اللي توفى نهار 24 يوليو اللي فات عن عمر 71 عام بسبب أزمة قلبية، خلّى وراه ثروة كتقدّر بحوالي 5 مليون دولار، واللي مشات كاملة لولدو نيك هوغان.

وعلى حساب ما جابت مجلة US Weekly، نيك اللي عندو دابا 35 عام، تعيّن كممثل شخصي مشارك فـ التركة، واقترحو شخص سميتو تيري ماكوي باش يكون وصي على هاد التركة.

الوثائق بيّنات أن بنت هوغان، بروك، ماكانتش من بين الناس اللي غادي يورثو، وهاد الشي كان بطلب منها من سنوات، حيت كانت خايفة من المشاكل العائلية اللي تقدر توقع بعد وفاة الأب ديالها، وهاد الشي سبق وأكداتو فـ واحد الحوار قديم.

وقالت إن الخلافات ديالها مع باها ماكانتش بسبب المرا اللي تزوج بها فـآخر أيامو (سكاي ديلي)، ولكن كانت مشاكل شخصية بينهم ومرت من بزاف ديال الأزمات.

بالمناسبة، هالك هوغان، واللي السمية الحقيقية ديالو هي تيرينس جين بوليا، كان كيعاني من أمراض صحية معقدة بحال سرطان الدم والرجفان الأذيني. ورغم الشهرة الكبيرة اللي دارها فـ عالم المصارعة (WWE)، حياته الشخصية ماخلاهاش من المشاكل، خصوصا فـ علاقته مع العائلة ديالو.