كود كازا//

بعد الصداع اللي خلقاتو تصريحاتو على “خلط الورق بالطحين”، خرج أحمد التويزي، رئيس فريق الأصالة والمعاصرة بمجلس النواب، بتوضيح جديد، كينفي فيه المعنى الحرفي للكلام اللي قال، وتيقول بلي كلامو ’’تحرّف وتفهم غلط‘‘.

التويزي قال فتصريحو الأخير إن العبارة اللي استعمل ما كانتش حرفية، ولكن مجازية ومأخوذة من التعبيرات اللي كيتداولو المغاربة فالحياة اليومية، والمقصود بها هو التلاعب فالوثائق والفواتير اللي كيتقدمو للإدارات باش ياخدو الدعم العمومي، ماشي طحن الورق فعلاً ولا خلطو مع الدقيق.

وأضاف المسؤول البرلماني أن فكرة طحن الورق بالمعنى الحقيقي ’’ماشي منطقية لا اقتصادياً لا واقعياً”، لأن الورق أغلى بزاف من الدقيق، وهادشي كيخلّي أي تفسير حرفي للقضية “غير قابل للتصديق‘‘.

تصويب التويزي على الفيسبوك خلا بزاف ديال المتفاعلين ينتاقدوه أكثر، بحيث عوض ما يعتذر أو يسحب كلامو اللي قال فالجلسة، اختار يبرّر ويقول بلي كان غير “تعبير مجازي”. ولكن الطريقة اللي دار بها التوضيح بانـت للبعض غبية ومتناقضة، حيت ما زادش يوضّح المضمون، ولكن زاد زعزع الموقف ديالو وقدّم راسو بحالا ضحية تحريف وتغيير كلامو فالبرلمان.