عمر المزين – كود///

غادي تبدا غرفة الجنح التلبسية بالمحكمة الابتدائية بمدينة فاس، انهار الجمعة 26 دجنبر الجاري، في محاكمة شي نصاب دارها بعدد من الضحايا، بعدما تابعو وكيل الملك من أجل “تعدد قضايا النصب والاحتيال”، وهبطو لحبس بوركايز لخطورة الأفعال.

وحسب ما كشفت عنه مصادر “كود”، فإن المتهم “أنوار.و” اللي سبق ليه تطرد من المندوبية العامة لإدارة السجون عرض أحد الضحايا للنصب وخدا ليه 52.500 درهم، بعدما أوهمه أنه غادي يتوسط ليه في توظيف شقيقته بإدارة الضرئب، مشيرا باللي هاد لفلوس عطاها ليه بحضور شي حد.

كما عرض المعني بالأمر ضحية آخر للنصب في مبلغ مالي قدره 40.000 درهم سمله نقدا بعدما أوهمه أنه غادي يخدم ليه خوه في صفوف إدارة الجمارك والضرائب الغير مباشرة.

ضحية آخر تعرض للنصب من طرف هاد النصاب اللي خدا ليه 30.000 درهم، والذي ادعى به أنه عندو علاقة بشخصيات نافذة بمدينة الرباط على غرار المشتكين الآخرين، وأن بإمكان توظيف نجلي شقيقته في صفوف إدارة الجمارك.

وحسب ما كشفت عنه مصادر “كود”، فإن المتهم تشد عند بوليس إفران لكونه كان يشكل موضوع مذكرة بحث على الصعيد الوطني صادرة عن المصلحة الولائية للشرطة القضائية بفاس، مشيرة إلى أن هاد النصاب كان كيدير هاد الجرائم هادي أزيد من 5 سنوات.

الفرقة المالية والاقتصادية الثانية بولاية أمن فاس كانت لقات عدد من الوثائق عند المتهم فدارو خلال إجراء تفتيش قانوني بداخله، واعترف بالجرائم اللي دارها باستعمال هاد الأسلوب الإجرامي، وبكونه كيعرف شخصيات نافذة فالرباط.