كود – املشيل//

خرجات مسيرة احتجاجية قاصدة عمالة ميدلت من دوار أيت علي ويكو دائرة أوتربات لي بعيدة بـ36 كيلومتر على إملشيل، فخطوة تصعيدية كتعبّر على القلق بسبب التهميش والإقصاء اللي كتعاني منو المنطقة هادي سنوات طويلة، واستمرار العزلة وصعوبة الولوج لأبسط الحاجيات.

https://www.facebook.com/share/r/1HMfmJRdNa/

الساكنة طالبات بفك العزلة بقنطرة حقيقية ومأمنة، خصوصاً ففترة الشتا اللي كتفيض فيها الويدان وكتعزل الدواوير، بالإضافة لتوفير نقل مدرسي لايق للتلاميذ، بعدما ولات وضعية النقل الحالية كتشكّل خطر مباشر على سلامتهم وكتهدد حقهم فالتعليم بسباب الطريق لي مكايناش.

كما قالو المحتجين بلي الحلول الترقيعية بحال القوادس ما كتعالجش المشكل من الجدر، خصوصا مني كيطلع منسوب الما فلويدان سوا فواد أيت عمر أو بين أيت علي ويكو وتاوريرت، وأكدو أن المنطقة كتعاني من هشاشة بنيوية خاصها حلول تنموية حقيقية ماشي مؤقتة.

وفي هذا السياق، سبق لݣود زارت المنطقة وعاينت ميدانياً مشاكل العزلة وصعوبة التنقل والطرقان لي مدݣدݣة والريزو لي ميت، هاد الغياب ديال الحلول ملموسة خلى الساكنة ترجع للاحتجاج السلمي والحضاري، وأكدو استمرارهم فالنضال المشروع حتى تتحقق المطالب وتُرفع المعاناة عن الدواوير المنسية.