كود الرباط//
قبل بضعة أسابيع فقط كان البيجيدي يتغنى بإشراف وزير الداخلية عبد الوافي لفتيت على الانتخابات، وكان ادريس الأزمي القيادي فهاد الحزب يعتبر أن وزارة الداخلية غادا فالطريق الصحيح، وقال زعيمهم عبد الاله بنكيران بعدها أنه لمس نفس إيجابي جدا.
والكل كيعرف بأن هاد المواقف كانت فقط ضدا فعزيز أخنوش، رئيس الاحرار، وفرحو ملي ما بقاش الإشراف ديال رئيس الحكومة وتحول لوزارة الداخلية. رغم اخنوش براسو فرحان للقرار وعلنها ف برنامج تلفزي واعتبر القرار مزيان باش يكون الحياد.
دابا بان الپلان واضح، وزير الداخلية ما كيلعبش، وما داخلش فهاد التخربيق والتبرهيش السياسي، وتصورو واضح وفضح بيه لعب البيجيدي. واليوم فلجنة الداخلية بمجلس النواب، كان واضح ملي عطا مساج سياسي قوي للبي جي دي، ومفاده باركا من البكائيات ف الندوات الصحافية وجيبو مقترحات عملية وماشي بحال هاد المقترحات لي حطو ف القوانين الانتخابية.
دابا واش البيجيدي مشا يدير ندوة صحفية مباشرة عشية التصويت على القوانين الانتخابية في لجنة الداخلية؟؟ واش كاين شي لعب كثر من هادا؟؟ واش من رسالة باغي يعطي البي جي دي للمؤسسات لي ديما كيتشدق بها.
لفتيت قال اليوم فلجنة الداخلية :”اللي مخوفني هو الحزب ديالكم لي كيطالب حماية الانتخابات من الفساد كيثبت العكس. عكس ما كتروجو ف الندوات”، كلام لفتيت جاء ردا على تعديلات وصفها بلي ماشي قوية فهاد المادة 6 لي كتمنع لي عندهم متابعات وحالة تلبس يترشح فالانتخابات البرلمانية.
وأوضح وزير الداخلية :”حماية العملية الانتخابية هي هادي. كيفاش واحد حصل ف حالة تلبس يترشح. ونتسنا الحكم النهائي عاد نمنعو”.
وأشار لفتيت بلي دول ديمقراطية منعت الترشح بالحكم الانتخابي، مشددا بلي :”هادشي لي كاين فالمادة 6 باش نحميو المؤسسات . وخصنا نمشيو فالتشديد فهادشي”.
ولفتيت تحسر بلي اغلب تعديلات لي تقدمو ماجاوش با يزيدو يزيرو باش نحميو مجلس النواب.
وبخصوص الجدل ديال دستورية المادة 6، قال لفتيت :”حنا نديرو خدمتنا والمحكمة الدستورية هي دير خدمتها. للي كيألمني ف نقاش مجتمعي مهم ونجيو ونحيدو بداكشي لي كنطالبو غذا نتشكاو فلوس يتعطاو. ومحكوم تقدم . يا نحميو قرينة البراءة يا نحميو المجلس ” ف رد سياسي على البي جي دي.
ولفتيت مزح بمساج سياسي، ممثل مجموعة البي جي دي بالقول :”التعقيب ديرو ف الندوات الصحفية”.
لفتيت بان معجبوش الحال فاش البي جي دي مشا دار ندوة صحافية قبل ما يتم مناقشة التعديلات فلجنة الداخلية، فمحاولة للتأثير على الرأي العام وتأليبها ضد تعديلات جابتها الداخلية.
للتذكير، فبداية مناقشة مشروع قانون المالية، ناض عبد الله بوانو (الملقب ب عسيلة البي جي دي) وف اطار الحرب “عدو عدوي صديقي”، (ناض) كيضرب فوزيرة المالية حيث مشات هضرات ف قناة سكاي نيوز على قانون المالية وقاليها ما مفاده علاش مشيتي وهذا احتقار للبرلمان وو..نفس القيادي ومعه بنكيران والازمي دارو ندوة صحافية قبل ساعات من مناقشة تعديلات القوانين الانتخابية، ختار الندوة الصحافية بلاصت مؤسسة البرلمان.
واش البيجيدي كان يحلم بالتأثير على مواقف الأغلبية؟ أن أنه كان يحلم بإحراج وزير الداخلية عبد الوافي لفتيت؟؟
قبل أسابيع كان لفتيت غزال ومزيان وديموقراطي، ودابا خاصنا نديرو ندوة صحفية لإحراقه؟؟ هادي سياسة “الاخوان”.. نتحالف معك استراتيجيا ف الحرض ضد رئيس الحكومة ونحاربك فاش نشوف مصالح كتمس.
هاد البيجيدي مشا ليه اللوجيك ديال السياسة، وما بقا عارف واش يعارض أخنوش بوحدو ويضرب بيه لفتيت، ولا يعارض وزير الداخلية ويضرب بيه المحكمة الدستورية؟؟.
العمل السياسي عندو منطق ويمشي على قواعد واضحة، ماشي بالمزاجية وآجي يا فم وطلق، وهاد التخربيق ما واكلش لا مع وزير الداخلية لا مع باقي أعضاء الحكومة.
البي جي دي لي خدا من مارشي واحد ف الصحة داير عليه ندوة حيث لي ربحو شركة وزير ف حزب خصم، ونسا مئات المارشيات للي منهم صحابهم نيت وخوت صحابهم. “كود” مستعدة تعطيهم امثلة.
