كود – بني ملال //

دارت  ساكنة دوار أيت عبي، التابع للجماعة الترابية تيلوكيت بإقليم أزيلال، نداء استعجالي للمسؤولين، كتأكد فيه باللي تعزلات  بسبب التساقطات الثلجية الكبيرة لي عرفات المنطقة فالأيام الأخيرة.

وحسب معطيات  فعدد كبير من الساكنة ديال أيت عبي حاولو صباح اليوم الجمعة 26 دجنبر 2025 يفكّو العزلة غير بالبالة، وشقّو  مسلك صغير باش يدوزو الحمير والبهايم ، فمحاولة للوصول لمنطقة توجوضين تالمست فالحدود مع زاوية أحنصال، فين كاين محل ديال بيع العلف ديال الماشية ، باش  يشريو العلف لشياه لي  مهددة باش تموت  بعد ما سالا لها العلف، ولكن  الثلج  حبسوهم وما قدروش يكملو الطريق، ورجعو منين جاو .

داكشي علاش ناشدات ساكنة السلطات باش تدخل  وتفك العزلة عليهم وعلى البهايم  ديالهم، خصوصاً وأن الثلج غطّى كاع  المراعي وما خلاش إمكانية نقل القطيع لمناطق الدير حتى دوز الشتاء ويدوب الثلج.

الساكنة كتقول  باللي أيت عبي ولات كتعيش مشاكل كبيرة فالتزويد، بسباب الثلج لي كيحبس الطريق  ، وهاد الشي خلق صعوبات فالحصول على المونة وحتى على الأعلاف الضرورية باش يبقى القطيع عايش فهاد الظروف الصعيبة.

للإشارة السلطات المحلية دارت مجهودات ووصلات مساعدات ديال مؤسسة محمد الخامس للتضامن لساكنة أيت عبي المحاصرة من قبل ، ولكن الساكنة كتأكد باللي الوضع مازال كيتطلب تدخل استعجالي اخر ، خصوصاً مع كترة  الثلج لي كيطيح و درجة الحرارة لي نزلات تحت الصفر .