كود -وكالات//

احتجاجات كبيرة كتعرفها فرنسا هاد الأيام، بعدما خرجو تلاميذ الثانويات والطلبة للاحتجاج على نقص الموارد فالتعليم، غياب الأساتذة، والتكرفيص ديال بعض المؤسسات التعليمية، وظروف الدراسة اللي كيعتابروها ماشي لايقة، كما كاين غضب من الضغط المرتبط بنظام «باركورسوپ» اللي كينظم الولوج للتعليم العالي.

الحركة بدات قبل فعدد من ثانويات لي حدا باريس، قبل ما تنتشر وتوسع فمناطق البلاد، وحسب وزارة الداخلية، وصل عدد الثانويات اللي تسدات بشكل كلي أو جزئي ل 356 مؤسسة الأربعاء، مقابل 338 نهار الثلاثاء.

والاحتجاجات ما بقاتش غير فالثانويات، حيث التحق بها 30 حرم جامعي فمدن من بينها باريس، ليل، مارسيليا، ليون وستراسبورغ.

فبعض المدن، ترونات الاحتجاج ، وشعلات العافية ف3 المؤسسات تعليمية، كيف ما تعرضات 9 مؤسسات لضرر، حسب السلطات، مع توقيف 18 لواحد,وفـالليل تدخل البوليس بالكريموجن، وتسجلات أعمال تخريب وإحراق البركاصات.

وزاد الصداع بسباب مشروع حكومي كيهم التعليم العالي، حيث كتقترح الحكومة فرض رسوم تسجيل سنوية على الطلبة لي معندهمش المنحة.