عثمان الشرقي – كود //

حزب التقدم والاشتراكية خرج ببلاغ رسمي بعد ما دار البوز واحد الفيديو كيبان فيه نبيل بنعبد الله، كيهضر مع رجال الأمن وكيقول ليهم يمنعو أي واحد يقرّب

الناس فالسوشيال ميديا بدات كاتفسّر الفيديو بطرق مختلفة، وكاين اللي خذاه كأنه فيه نوع من التعالي أو إساءة.

لكن الحزب وضّح الأمور وقال بلّي الفيديو تفسّر خارج السياق ديالو، وأن داك المقطع ما كيعكسش الواقع، حيث كان فظروف تنظيمية خاصة، وكان الهدف غير ضمان النظام والسلامة.
الحزب زاد وشدّد أن أي محاولة باش يتم استغلال الفيديو سياسياً أو إعلامياً فهي مرفوضة تماماً، وأكّد بلّي حزب التقدم والاشتراكية باق كيدافع على القضايا الوطنية والاجتماعية ديال الشعب المغربي، وبكل مسؤولية وصدق.

وبهاد الطريقة، الحزب حاول يوقف موجة التأويلات اللي خرجات فالفايسبوك و”إكس” بعد ما انتشر الفيديو بزاف، خصوصاً وأن نبيل بنعبد الله معروف بأسلوبو المباشر، اللي بعض المرات كيتفهم بطريقة مختلفة على حسب الزاوية اللي كيتشاف منها الموقف.

بالمقابل، متابعين سياسيين قالو بلّي البلاغ جا ضروري باش ما يتمش تضخيم الموضوع، خصوصاً فهاد الظرف اللي كتعرف فيه الساحة السياسية حساسية كبيرة، وأي فيديو ولا تصريح صغير كيتحوّل بسرعة لقضية رأي عام.