عمـر المزيـن – مكتب الرباط//
[email protected]

حصلت “كود” بشكل حصري على التفاصيل الكاملة لاعتقال خالد وية مدير الوكالة الحضرية لمدينة مراكش، الذي ضبط متلبسا بالارتشاء من قبل عناصر أمنية تابعة للفرقة الجهوية للشرطة القضائية بعاصمة النخيل.

وقالت مصادر “كود”، أن عملية توقيف مدير الوكالة الحضرية بمراكش تابعها محمد عبد النباوي، الوكيل العام لمحكمة النقض، رئيس النيابة العامة، الذي سبق أن توصل بشكاية من أحد المقاولين، يتهم فيها هذا المسؤول الذي تجمعه به علاقة صداقة وطيدة بابتزازه مقابل حل مشكل توقيف أشغال مؤسسة فندقية كبيرة تتواجد بالحي الشتوي.

وكشفت المصادر أن المقاول المذكور اتفق مع الموقوف باش يعطيه 120 مليون سنتيم مقابل يحل ليه المشكل ديال الفندق اللي موقفة فيه الأشغال ومشارك فيه مع مواطن أجنبي ينحدر من سويسرا. مصادر “كود” قالت على أن المقاول اعطا هادي أيام 60 مليون للمتهم وبقات 60 أخرى وهي اللّي غادي تجيب ليه التمام.

البارح الخميس داك المقاول دار مع مدير الوكالة الحضرية ديال مراكش باش يتغدا معاه فواحد المحطة ديال ليصانص. فحسب مصدر “كود”، فإن هذا الأخير تسلّم الدفعة الثانية من المبلغ المتفق عليه (60 مليون) ومشا بحالو لكن السيد مكانش عارف أن الوكيل العام بنفسه تابعو بالسيارة ومعاه البوليس من الخلف.

مدير الوكالة الحضرية ديال مراكش، تقول مصادر “كود”، خاف من شاف سيارات تابعينو من الخلف وهو يكسيري باش يهرب عليهوم قبل أن يصطدم بسيارة ويتسبب الحادث في إصابة شي بوليسي كان في مهمة نظامية. داك الساعة نزل كولشي بما فيهم الوكيل العام والبوليس وشدو مدير الوكالة ومشاو معاه لدارو باش يقلبو كولشي.

المصادر ذاتها قالت أن البوليس حجزو بزاف بزاف ديال الوثائق من منزل الموقوف، قبل أن يتقرر نقله إلى مقر الفرقة الوطنية للشرطة القضائية فكازا، حيث يتواصل حاليا التحقيق من قبل فرقة الجرائم المالية والاقتصادية التابعة لـ”BNPJ”.