احمد الطيب كود الرباط///

شاعلة فحزب الأحرار بسبب التعديل الحكومي، بحيث ان قيادات قديمة فالتجمع الوطني للاحرار مقلقين وكيهضرو٬ ولكن لانهم جبناء غير فالكواليس٬ على أخطاء رتاكباتها قيادة الأغلبية فالتعيينات لي تدارت، وكيقولو بلي نزار بركة هو المستفيد الوحيد من التعديل: صفاها لتيار ولد الرشيد، وبلاصا دياولو فالحكومة وفقيادة الحزب وحرج حزب التجمع الوطني للأحرار.

شي تجمعيين قدام ولكن غير فالكواليس كيقولو باللي هاد الاستغناء على قيادات الحمامة لصالح تقنوقراط٬ وهاد الشي اللي دارو الاستقلال٬ كيخليه يصبح منافس محتمل للبام وللاحرار على المرتبة الأولى فانتخابات 2026.

هادو كيقولو باللي القيادات ديال الاحرار ما غادياش تكون متحمسة تدافع علي الحكومة فنسختها الثانية.

الوزير بايطاس براسو كيبان تالف وأصبح كيشوف صعود نجم لحسن السعدي لي تعطاه قطاع سياسي كبير ومهم لي هو قطاع الصناعة التقليدية والاقتصاد الاجتماعي والتضامني (أكثر من 6 مليون معني) بلي هو دينامو جديد فالحزب فصورته المقبلة ف 2026.

القياديين ديال التجمع كيقلبو على “من يعلق الجرس” ويمشي يهضر مع رئيس الحزب ويقول ليه راه هاد التعديل الأخير ما مزيانش بالنسبة لصورة الحزب عند الرأي العام، لكن تا واحد ما قادرش يهضر. كولهوم خايفين وخاصة لي ستافدو ف 2021.