كود سبور//

مرة اخرى كايبينو ألمانيا أنهم ناس ديالو التعايش واحترام الحريات الفردية، ونموذج يحتذى به فاحترام الاختيارات الشخصية ديال الأفراد، وتأكد ثاني هذا الشي من خلال فريقهم الكبير بايرن ميونخ.

بايرن ميونخ وكيف ديما ومع بداية كل موسم، كايدير تصويرة جماعية للاعبين ديالو مع السبونسور د البيرة المشهور للفرقة، وهي التصويرة اللي كايبانو فيها اللعابا شادين كاس د البيرة.

هذه المرة كان التصويرة مميزة حيث كان فيها الدولي المغربي إسماعيل الصايباري اللاعب الجديد د بايرن ميونخ، واللي بان مع صحابو اللعابا وهو ناشط، والبايرن خلاوه على خاطرو وما بزّزوش عليه يشد البيرة صحا، وحتى هو بان فالتصويرة ما شادش الكاس حيث ما كايشربش، ومكانش عندو مشكل صحابو شادين الكيسان حيث هما كيشربو..

وماشي اول مرة كايوقع هذا البلان فبايرن ميونخ مع لاعب مغربي، ولكن فايت وقع مع الدولي المغربي نصير مزراوي اللي يبان فالتصويرة بلاما يشد الكاس.