كود-كازا//

الفنان التشكيلي عبد الكريم الوزاني غايعرض لأول مرة فغاليري L’Atelier 21 فكازا، من نهار الثلاثاء 9 دجنبر 2025 حتى 10 يناير 2026، فمعرض تحت عنوان “طفولة الفن”. فهاد المناسبة، الغاليري غيطبع كتاب عن أعمالو تحت عنوان “شعرية المادة”، والنص مكتوب من طرف المؤرخ الفني محمد الميتالسي. توقيع الكتاب غيكون فالليلة ديال الافتتاح، بحضور الفنان والمؤلف.

العنوان ديال المعرض، “طفولة الفن”، كيرجع لهاد البحث على العفوية، الإبداع الحر، والفرحة الصافية اللي كانت فالأساس ديال الجمالية عند كبار الفنانين ف القرن العشرين بحال بابلو بيكاسو، هنري ماتيس، بول كلي وجوان ميرو. عبد الكريم الوزاني كينتمي بلا شك لهاد العائلة ديال الفنانين. العنوان كيرجع حتى لتأثير الطفولة ديالو، على الفنان الراشد اللي ولى واحد من أهم الفنانين المغاربة وطور أعمال غنية كتزيد التراث الوطني قيمة.

فالكتاب على أعمال عبد الكريم الوزاني، محمد الميتالسي كيشرح المسار الإبداعي ديالو بهاد الطريقة: “الحديد والصدا والألوان كيهضرو مع بعضهم باش يصنعو عالم فيه الأشكال كتحور وكتبدل باستمرار. الوحوش كتشطح، والألوان كتلمع، هاد القدرة على إعادة سحر العالم عبر الإبداع كتفكرنا بفكر نيتشه، اللي كيقول بلي “الطفل الأبدي” هو اللي من خلال اللعب الإبداعي كيتجاوز قيود المجتمع وكيرجع للحرية الأصلية. الوزاني، كيبقى حُر من قوانين الفن الأكاديمي ومطالب بالعفوية المضبوطة، وكيجسد شخصية الطفل المبدع.”

عبد الكريم الوزاني تزاد ف 1954 ف تطوان، وهو واحد من أهم الشخصيات ديال الفن المعاصر المغربي. تخرج من مدرسة الفنون الجميلة بتطوان ومن بعد مشا لباريس يكمل قرايتو، وكان مدير ديال المعهد الوطني للفنون الجميلة بتطوان، اللي علم أجيال كاملة ديال الفنانين. بجانب الخدمة التعليمية ديالو، الفنان طور أسلوب فني متميز، ما بين الرسم والنحت، اللي كيتعتابرو “رسم ثلاثي الأبعاد”. العالم ديالو، اللي فيه المرح والعمق، كيجمع بين اللوحة والحجم فاحتفال بالمادة والحياة.

الأعمال ديالو موجودة فبزاف دالمجموعات مهمة، بحال: متحف محمد السادس للفن الحديث والمعاصر (المغرب) مؤسسة أليانس (المغرب) وزارة الثقافة (المغرب) مؤسسة المدى (المغرب)

Saham Bank  (المغرب) مجموعة بنك المغرب

الفنان كيسكن وكيخدم ف تطوان.

غاليري L’Atelier 21

مفتوح من الاثنين حتى السبت من 9:30 حتى 13:00 ومن 14:30 حتى 19:00