سعيد الشاوي كود كازا ///

اللي واقع فعمالة النواصر فضيحة كبيرة. اللي لقاتو السلطات فالعشوائيات راه كثير بزاف بزاف. قصر لكريملن غير نموذج لهاد التسيب. شي حد اسمو امحزون بنى قصر فارض فلاحية. عندو رخصة بناء 200 متر على كل گطار. السيد دهن كلشي وتحولات 200 متر مربع لألفين متر مربع. من بلاصة ديال الخيل تحول لقاعة حفلات ودار الضيافة فيها بيوتا باغي يكريهم.

السلطات قالت باللي فعهد العامل السابق تسحبات ليه الرخصة. هاد الشي ماشي كافي. يريبو ليه قرار خاصو يدار. لكن خاص يتحاسب هو ومعاك لمقدم والشيخ والقايد والباشا والعامل ديال النواصر ديال ديك الجماعة ديال بوسكورة اللي كاين فيها هاد لقصر. ماشي غير خاص محاسبة هادو. خاص يمشيو ليهم لحساباتهم فالبنك واملاكهم وديال اولادهم وعيالاتهم ولا كان مدخولهم ما كيتناسبش مع املاكهم يصادروها كلها ويتابعو قضائيا.

فضيحة اخرى وقعات فجماعة بوسكورة ولكن فالجهة الاخرى دالغابة من لوطوروت ليه. كاين واحد السطاسيون واوطيل جديد. هاد الشي ديال لملايري بلا اللي كان عندو كباري البينجاب فعين الدياب فكازا.

هادا كان داير فالصطاسيون ديالو عشوائيات منها “پول” وشي تخربيقة كتبيع السوشي. تصورو كاع المسؤولين كيجيو عندو وكيشوفو هاد الشي وما عمر شي حد سولو باللي هاد الشي غير قانوني. باش جات الحركة ضد العشوائيات ناض هاد بلا ريب لراسو. ما ريبوش ليه. هادي راها اهانة للدولة واهانة لكلشي. لملايري ما كيخاف من حد. حول “پول” حدا لوطيل اللي بناه فوق ارضو “هيلطون”. بحال ايلى ما وقع والو.

علاش ما يتابعوش هاد لملايري. راه سنوات وهو كيستغل هاد “بول”. دخل فلوس كثيرة من العشوائيات. ثم كيفاش هاد “پول” دارت معاه هاد لبيعة والشرية وسمحات لماركة ديالخا تكون فبلاصة عشوائية.

خاص كلشي يتابع وخاصو يخلص للدولة فلوس كثيرة.

راه هاد الشي ديال الترياب ما عندو قيمة ايلى ما تحركاتش قضايا ضد اي واحد فالسلطات وضد هادوك اللي دارو عشوائيات. بحال هاداك لملايري السمسار اللي كيستغل الصحافة واللي دار لمراتو معمل ديال الكاشير فمنطقة فلاحية. ناض حتى هو بحال لملايري بلا وخرج الماتيريال كولو وحتى هو باغي يريب لراسو.

هاد التصرفات كتمس بهبة الدولة. بدولة الحق والقانون.