كود – كازا //

دارت وزارة التربية الوطنية والتعليم الأولي والرياضة خطوة جديدة فمجال تعليم اللغات والهوية المغربية لولاد الجالية المقيمة فالخارج، بعدما قررات تفتح مصلحة إدارية خاصة كتتكلف بدعم وتتبع تدريس اللغة العربية والأمازيغية، ولتاريخ وجغرافية المغرب.

هاد القرار جا بموجب القرار الوزاري رقم 1275.26، اللي خرج فبداية يونيو 2026، قبل ما يتم نشرو رسميا فالجريدة الرسمية فشهر شتنبر الجاري.

القرار كينظم الهيكلة الجديدة ديال الأقسام والمصالح التابعة للإدارة المركزية ديال الوزارة، وكيحدد الاختصاصات ديال كل مصلحة.

هاد المصلحة غادي تكون تابعة لقسم التعاون والشراكات، وغادي تهتم بتتبع ومواكبة البرامج التعليمية الموجهة لأبناء المغاربة المقيمين فالخارج، والتلاميذ اللي كيقراو فمدارس البعثات الأجنبية الموجودة فالمغرب.

وما غاديش تقتاصر الخدمة ديال هاد المصلحة غير على الجانب اللغوي، ولكن غادي يكون عندها دور فالحفاظ على الارتباط بالثقافة والتاريخ والهوية المغربية، بتعليم تاريخ وجغرافية المملكة فهاد المؤسسات التعليمية.