كود طنجة//

علمت “گود” بلي اعضاء وقيادات واعيان حزب الاصالة والمعاصرة وحتى جزء مهم من الرأي العام فطنجة غادي يفهمو ان الاجتماع للي غادي تترأسو بنت الباشا ومعاها القيادة د الحزب فطنجة هو بمثابة رسالة دعم غير مشروط لعمدة طنجة، خصوصا وان اللقاء سينظم فالفيلا ديال الليموري، وتماك غادي يتناولو وجبة الغذاء للي طبعا غادي يتكلف بيها عمدة طنجة.

كولشي كيعرف انه كاين استياء ديال أغلبية المستشارين د التراكتور فجماعة طنجة من عمدة المدينة، وللي عندهوم عليه ملاحظات وانتقادات بسبب الأخطاء الكارتية للي ارتكبها فتسيير شؤون المدينة، بلا ما نهدرو على الفضائح الخطيرة للي تورط فيها، وحتى الاجتماعات للي كيعقدها فريق الحزب بجماعة طنجة كتعرف غياب كبير، هاد شي بلا مانهدرو على عدم الانضباط ديال مستشاري البام فعدة محطات.

الناس د البام كانوا كينتظرو هاد الاجتماع مع بنت الباشا باش يطرحو المشاكل الكبيرة للي كيعرفها الحزب فطنجة بسبب الليموري للي هو الامين الإقليمي د الحزب وعمدة طنجة، وللي متحالف مع الامين الجهوي عبد اللطيف الغلبزوري، هاد السيد كيستغل الثقة للي دايراها فيه بنت الباشا باش يخدم الأجندة ديال عشيرو الليموري.

وحسب مصادر حزبية، فراه المناضلين د الحزب ما يقدروش يناقشو مشاكل التراكتور فطنجة او ينتقدو الليموري، حيث الاجتماع منظم فالفيلا ديالو وهو للي مخلص الغدا.