احمد الطيب كود الرباط//

على عكس ما تدعيه قيادة حزب الأصالة والمعاصرة، بخصوص سبب تأجيل دورة المجلس الوطني شهرين إضافيين حيث سيعقد في 24 يناير المقبل، واللي قالو بلي انه مرتبط بمرض رئيس المجلس، وبعدما تأكدت “كود” من مصادر كثيرة بلي هادشي كذوب، وعلى لسان رئيس المجلس الوطني نجوى كوكوس للي اعترفت لـ”كود” بلي كانت حاضر فالعرس يوم السبت 22 نونير وهو نفس يوم تأجيل المجلس الوطني، “گود” جابت معطيات اخرى تفيد بلي التأجيل كان بسبب أزمة قيادة الحزب فالانتخابات المقبلة.

فهاد المجلس الوطني المقبل لي غايكون رسميا فبداية سنة 2026 للي هي سنة انتخابية، أكيد غادي يتحدد مصير البام، يا غايكون بقائد قوي، يا غايكمل بهاد التشرذم فالقيادة الجماعية بثلاثة رؤوس كل رأس كيشرق وكيغرب، لذلك هاد دورة يناير غاتكون حاسمة.

لذلك طرحت سيناريوهات كثيرة كادور ف كواليس القيادة الخفية للبام وبعض اعضاء المكتب السياسي ، واللي هوما مرتبطين بقاعدة قيادات ف مراكش منهم اخشيشن والمنصوري وبعض المؤسسين للحركة لكل الديمقراطيين وقيادات فاعلة فكازا، وللي فيها (هاد السيناريوهات) انه يكون تغيير ف شكل القيادة الجماعية ويولي امين عام واحد.

سياق القيادة الجماعية، للي كان ف ظرفية صعيبة فتاريخ البام. لجوج اسباب رئيسية منها ملف اسكوبار الصحراء واللي تشدو فيها قيادات كبيرة فالبام منهم رئيس جهة الشرق ودينامو البام فكازا سعيد الناصري، وكذا اخطاء وهبي التواصلية وتقربه من الاحرار (هاد السياق) مبقاش، لذلك كيفكرو يرجعو للصياغة القديمة.

وتروج سيناريو اخر، هو ان يكون شيفور جديد للتراكتور، فيه مواصفات مختلفة، ويكون هو الجوكير ديال البام فالانتخابات المقبلة والمنقذ من ازماته التنظيمية وفضائحه، بكاريزما ديالو وقوة شخصيته واسلوب تدبيرو للي فيه الصرامة والحكامة.

لذلك البام باش يتقاد ويوجد للانتخابات خصو جوكير، يقول مصدر “گود”، خصوصا وان قيادة البام كتعرف بلي كاين هاد الجوكير وقاد بالحزب.

هاد السيناريوهات، كاملة، نفاها عضو قيادي بارز فالمكتب السياسي للبام وقال بلي “هذا كلام خاوي” ، وكله كذب.

هاد النفي، ما كيعنيش بلي أطراف ضد استمرار القيادة الثلاثية، خصوصا مع الفعايل لي داير المهدي بنسعيد وكيفاش ضعف المنصوري وغبرها سياسيا وماخلاهاش تبان امرأة تقود حزب حداثي كانت محتاجاه البلاد ف نقاش مدونة الاسرة والتسريع باخراج القانون الجنائي ولكن هادشي مكانش، كيبان غير بنسعيد (للي ضعيف سياسيا واديولوجيا) ومعه شي شباب “براهش سياسيا “. ناهيك على الظروف الصحية للمنصوري للي كتخليها تغيب على التنظيم وحتى البرلمان والوزارة.

يشار بلي البلاغ الصادر عن سكرتارية رئاسة المجلس الوطني لحزب الأصالة والمعاصرة، قال بلي سبب تأجيل الدورة 31 للمجلس الوطني هو “ظرف صحي طارئ ألم بالسيدة الرئيسة”، توصلت “كود” بمعطيات حصرية وموثوقة كتكذب رواية المرض.

مصادر مطلعة داخل الحزب كشفت لـ”كود” أن نجوى كوكوس، رئيسة المجلس الوطني، ما كانتش مريضة نهائياً فنهار التأجيل لبارح السبت ، بل كانت حاضرة فعرس نجل خديجة الرويسي القيادية فالبام سابقا وسفيرة المغرب بالدنمارك. نفس المصادر أكدت أن كوكوس بقات لأزيد من ساعتين وسط الاحتفال، وكانت ناشطة ومتفاعلة، و”شطحات مزيان” حسب تعبير مصدر حضر الحفل.