كود سعيد الشاوي كازا ////

ول البارح الاثنين 14 يوليوز دارت الفيدرالية الوطنية للمنعشين العقاريين اجتماع دوري مع يوسف التازي رئيس الشركة الجهوية المتعددة الخدمات الدار البيضاء سطات. اجتماع كيدار كل شهر. حسب مصادر “كود” فالتازي كان موجد يجبد التسعيرة الجديدة للمنعشين العقاريين. مصدر من الفيدرالية حضر للاجتماع قال ل”كود” باللي رئيس الفيدرالية كميل توفيق اثار مساهمات شركات العقار اللي كانت تفرضات على هاد الشركات للمساهمة فتمويل مشاريع فكازا وسولو فين مشات هاد المساهمات ووقتاش غادية تسالي. طبعا التازي، حسب مصدر “كود” تفادى يثير موضوع التسعيرة الجديدة فليطاكس (الضريبة) ديال الضو والما، باش تار الموضوع.

مصدر “كود” اكد باللي هاد الموضوع غير تأجل وباللي غادي يجبدو وباللي التازي باغي يطبقو ومحتمل جدا يكون هاد الشي فالشهر الجاي غشت. الاجتماع ما خرجش بشي حاجة باستثناء اثارة بعض المشاكل اللي كتواجه المنعشين العقاريين.

لكن واش هاد التازي قاد على هاد الشركة اللي حلات فبلاصة “ليديك”. “كود” سولات منعشين عقاريين فيهم وحدين مامنضوينش فالفيدرالية الوطنية للمنعشين العقاريين وفيهم اعضاء فيها، سولاتهم، على المشاكل اللي كتواجههم.

هادو اللي هدرات معاهم “كود” تشكاو من مدير كيهدد ما كتفاوضش “دابا كلشي كيقول خاص نوجدو مغرب 2030 وخاص شركات العقار تتحرك. فالواقع تلقى بحال التازي، كيعرف غير يهدد. باغي يزيد فالتسعيرة” يشرح منعش ل”كود”.

طاشرون اخر هدر ل”كود” مسؤول فاشل فالتفكير فحل المشاكل وباللي غادي يوقف السرعة اللي غادية بيه كازا “هادا راه ماشي ضد حركية العقار فكازا. راه ضد حتى توجهات المدينة كيف غادي بيها والي الجهة محمد امهيدية.

اللي كيعرف هاد التازي، مشى بعيد وقال باللي ما يمكنش ليه يفك مشاكل كازا. وانتقد اكثر من متحدث الشاف ديالو مصطفى الهبطي العامل مدير الماء والتطهير بالمديرية العامة للجماعات المحلية، بوزارة الداخلية. باش تشوف الشاف ديالو ولفضايح اللي وراه وجات فتقرير المجلس الاعلى للحسابات ف2009 واللي رصدات سوء التسيير باش كان مديرا لوكالة توزيع الماء والكهرباء بمراكش وباش رئيس مصلحة المراقبة المالية لتدبير شركة «أمانديس» في طنجة، كيبان العربون.

مصادر هدرات معاهم “كود” مشات بعيد وربطات البلوكاج اللي داير للعقار فكازا بتاريخ التازي يوسف. بحال ايلى كينتاقم من كازا. التازي كان مسؤول صغير فقسم تابع للاشغال فكازا قبل ما يمشي لاكادير مكلف بتدبير الما والضو “حتى فاكادير راه فشل. كيفاش فاشل فمدينة صغيرة بحال اكادير غادي ينجح فمدينة كبيرة بحال كازا” توضح مصادر “كود”. “جابوه وجاب معاه عقدة الموظف الصغير اللي كانو فكازا” تضيف مصادرنا وعليه “كينتاقم من المسؤولين المتمرسين”.

مستشار المعارضة قال ل”كود” باللي كازا فرحات باش تخلصات من “ليديك” من عقليتهم الاستعمارية ولكن خاص نستافدو من الايجابي فالتجربة ونحيدو الامور السلبية وباللي هاد التازي حتى ما هو ايجابي فالتجربة السابقة كيخسرو

باختصار حسب منعش عقاري ل”كود” “ايلى بغاو كازا تكون فالموعد ف2030 خاص يمشي فحالو امثال التازي. راه كيعيق مانافعش. خاص مدير كيخرج ويتحرك ويتلاقى ماشي ساد مكتبو عليه. كيفاش الوالي فالزنقة من الصباح متبع كلشي وهاد المسؤول ساد عليه. راه عقلية مختالفة واخا نفس الوزارة وهاد الشي كيحير” يختم مصدرنا اللي توقع كلشي يبقى “مبلوكي” معاه