كود الرباط//
هاجمت الأمانة العامة لحزب العدالة والتنمية وزير العدل عبد اللطيف وهبي خلال اجتماع استثنائي دار البارح الأحد 29 دجنبر.
هاد الهجوم جا بعد تصريحات وهبي (على إذاعة ميد راديو) حول تعديلات مدونة الأسرة، وهي المقترحات اللي وصفتها الأمانة العامة بـ”المستفزة وغير اللائقة والمتحايلة”، معتبرة أنها كتضرب في المرجعية الدينية للأسرة المغربية.
وعبرت الأمانة العامة، اللي كان كيرأسها عبد الإله ابن كيران، على رفضها للطريقة اللي كيدير بها وهبي هاد الورش المجتمعي الحساس.
وشددات قيادة البي جي دي على أن الأسرة ماشي قانون عادي، بل هي أساس المجتمع المغربي، وخص مراجعة المدونة تكون بحوار هادئ ومتوازن كيعكس قيم المغاربة.
وأضافت الأمانة العامة أن تصريحات وهبي زادت الطين بلة، خصوصا فمواضيع بحال التعدد، أهلية الزواج، والطلاق الاتفاقي. وأكدات أن هاد التصريحات خرجات على الإطار اللي رسمو الملك أمير المؤمنين، واللي كيحترم المرجعية الدينية وكيعتمد على المجلس العلمي الأعلى.
ورفضت الأمانة أي تعديل كيهدد استقرار الأسرة أو كيتعارض مع النصوص القطعية، خصوصا في مسائل بحال إيقاف سكن الزوجية عن التركة، تعقيد الذمة المالية بين الزوجين، وتسهيل الطلاق الاتفاقي.
وزادت الأمانة العامة تحفظها على قضايا بحال استمرار حضانة المطلقة لأولادها بلا ضمانات واضحة لحقوق الأب، وتقييد أهلية الزواج بعمر محدد دون مراعاة للخصوصيات الاجتماعية، وتحويل عقود الزواج إلى عقود “إذعان” كتعكس سيطرة طرف على آخر.
وختمات الأمانة العامة بالتأكيد على أن البيجيدي غادي يبقى كيواجه هاد التعديلات اللي كتضر بالأسرة والمجتمع، وغادي يتواصل مع المواطنين باش يوضح ليهم المواقف ديالو.
هاد البيان أكد بلي البي جي دي رجع لخطاب التطرف باش يضغط اكثر باش ميكونش تعديلات جوهرية وثورية في البرلمان. ضغط كيبين أن هاد الحزب مزال مدارش حتى مراجعات حقيقية.
