كود – الرباط//

وجه حزب التقدم والاشتراكية (البي بي اس) مدفعية النقد الثقيل للحكومة متهمًا إياها بـ”الكذب” على المغاربة والفشل الذريع ف تدبير ملف أضاحي العيد لهاد العام، وهو ما تسبب ف موجة غلاء غير مسبوقة كوات جيوب المواطنين.

وأكد المكتب السياسي لحزب بنعبد الله ف بلاغ رسمي ليه، أن تطمينات الحكومة والوزارة الوصية بخصوص وفرة القطيع واستقرار الأسعار كانت مجرد “شجاعة لفظية” وكلام على ورق. في حين الواقع ف الأسواق والكسابة صدم ملايين الأسر المغربية، اللي لقات راسها عاجزة على مسايرة أثمنة خيالية تجاوزات كل الخطوط الحمراء.

وجاء في بلاغ الحزب:”الحكومة باعت الوهم للمغاربة، والتدابير اللي دوزات بحال دعم المستوردين بـ 500 درهم للرأس ما عاوداتش بالنفع على المواطن البسيط، بل غنات غير الشناقة وكبار المستوردين”.

وانتقد حزب الكتاب غياب المراقبة الصارمة ف الأسواق، وخلو الساحة للشناقة والوسطاء ليعيثوا فيها فسادًا. وتساءل الحزب باستنكار عن مصير الملايير اللي تفرقات من ميزانية الدولة (فلوس دافعي الضرائب) لدعم استيراد الأغنام، ف الوقت اللي الدعم ما انعاكسش نهائيًا على ثمن الحولي ف السوق.

وشدد البي بي اس بأن هاد التدبير “سقطة مدوية” جديدة كتضاف للحصيلة الاجتماعية السلبية للحكومة، مشيرًا إلى أن الاستهتار بالقدرة الشرائية للمواطنين ف مناسبة دينية وعائلية مقدسة بحال عيد الأضحى، كيبين بوضوح الهوة السحيقة بين الخطاب الحكومي الوردي والواقع المعيشي المُر اللي كيعيشوه المغاربة.