كود ـ كازا//

عبّر عدد من أعضاء المكتب المسير ديال غرفة الصناعة التقليدية فجهة الدار البيضاء – سطات، على استيائهم الكبير من غياب رئيسة الغرفة جليلة مرسلي، على اجتماع هي اللي كانت دعات ليه، البارح الثلاثاء، واعتبرو هاد التصرف “نوع من الاستهتار ومحاولة التفرد بتسيير أكبر غرفة كتجمع الصناع التقليديين على الصعيد الوطني”.

أعضاء فالمكتب قالوا فتصريحاتهم إنهم تصدمو بعدما مشاو للاجتماع، وما لقاوش الرئيسة اللي وجهات ليهم الدعوة، بحيث جاو من مدن بعيدة بحال الجديدة وقطعو 100 كيلومتر، باش يكونو حاضرين، وفي الآخر لقاو الرئيسة ما جاتش، بلا حتى ما تعطي سبب واضح.

وأضافو أن هاد الغياب خلا النصاب القانوني ما يكملش، وبالتالي ما قدروش يديرو الاجتماع، وهادشي خلق حالة من الغضب وسط الأعضاء اللي حسّو بالإقصاء وبلي ما كاينش جدية فالتعامل مع مهام التسيير.

الرئيسة كانت وجهات دعوة رسمية للاجتماع، اللي كان مقرر يدار نهار الثلاثاء 29 أبريل، مع الحادية عشرة صباحاً، وهاد الدعوة كانت مستندة على القانون رقم 18.09 المنظم لغرف الصناعة التقليدية، وحددت فجدول الأعمال ثلاث نقاط مهمة: التحضير لمعرض جهوي للاقتصاد الاجتماعي والتضامني، وبرمجة معارض الصناعة التقليدية لسنة 2025، وبرنامج التكوين المستمر للصناع التقليديين.

لكن مع غياب الرئيسة، هاد النقط كاملة بقات معلقة، حتى يتم احترام المواعيد والحضور من طرف اللي كيطلب الاجتماعات.