كود-وكالات//

فجوّ كيجمع بين الترفيه والتعليم، خرجات واحد المبادرة جديدة سميتها ’’البيرة والضفيرة”، اللي بدلات  النظرة التقليدية ديال الأبوة فـأسترالية، مني كيتجمعو آباء باش ينشطو وفنفس الوقت كيتعلمو كيفاش يسرحو شعر بناتهم.

هاد المبادرة بدات فمدينة دوبو، مني واحد الأب دار إعلان فالسوشيال ميديا باش يشوف واش كاين اهتمام، وفعلاً تفاعل معاه عدد كبير ديال الآباء، الفكرة جاية من ترند انتاشر فتيك توك، وكيجمع بين “البيرة” كمشروب للراحة و”الضفائر” كرمز ديال العائلة.

فاللقاءات، كيتعلمو الآباء كيفاش يصايبو الشعر، ويسرحوه ويمشطوه، ومن بعد كيجربو مشطات بحال “كوو دشوفال” والضفاير، ومشاطي آخرين، الهدف ماشي غير تعلم التقنية، ولكن حتى تغيير الفكرة اللي كتقول بللي هاد الأمور غير ديال الأمهات، وفنفس الوقت تشجع الآباء يكونو حاضرين أكثر فحياة ولادهم اليومية.

الآباء اللي شاركو قالو بللي التجربة عطاتهم ثقة فراسهم وقرّباتهم لبناتهم، وخلّقات جو زوين ديال تبادل التجارب والهضرة على صعوبات الأبوة، منظّمي هاد المبادرة كيشوفو بللي عندها تأثير كبير حيث كتزرع قيم المشاركة والاهتمام وسط العائلة.