كود -وكالات//

رجعو جوج دالبوليس طاليانيين اللي كانو حاضرين فالتدخل الأمني اللي مات فيه المغربي عبد الرحيم فقير فمدينة بولونيا، للخدمة من جديد، ولكن هاد المرة فمهام إدارية وسط المصلحة، وماشي فالخدمة الميدانية.

وحسب وسائل إعلام إيطالية، الرجوع للخدمة جا فانتظار شنو غادي تخرج التحقيقات القضائية اللي مازال مستمرة فظروف وفاة فقير.

وفنفس الوقت، دخلات كاميرا الجسم (Bodycam) اللي كان لابسها واحد منهم فمرحلة مهمة من التحقيق. التسجيل توجه لمختبرات قسم التحقيقات العلمية التابع لقوات الكارابينييري RIS فالعاصمة روما، باش يتم استخراج نسخة جنائية منه وفحص المعطيات التقنية ديالو.

التسجيل كيمتد ل 40 دقيقة، وكيعتبر من الأدلة اللي ممكن تعاون المحققين فإعادة تركيب شنو وقع بالضبط خلال التدخل الأمني، خصوصاً فالدقائق الأخيرة اللي سبقات وفاة عبد الرحيم فقير.