سعيد بونصار – كود //

لقاو البوليس ديال هولندا مؤخرا، مبلغ ديال الفلوس تقدر قيمتو ب5 مليون أورو، وكمية من المخدرات وسلاح ناري، وسط دار مهجورة فالعاصمة أمستردام.

تفتيش البوليس للدار المذكورة جا بعدما دارو تدخل، فمدابزة بين شباب، بحيث شدو واحد فيهم أصلو من صربيا، وبعدما فتشو الطوموبيل ديالو وما لقاو فيها والو، انتاقلو معاه للدار اللي لقاو فيها المحجوزات.

عملية التفتيش اللي داروها البوليس، مكناتهم يلقاو 10 كيلو ديال المخدرات، والمبلغ المالي ولفردي، بحيث فاش استجوبو المتورط ما عطاهومش تفسير مقنع لسبب الدخول ديالو لهاد الدار.

هاد الدار المهجورة حسب مصادر محلية، قالت بللي كان كيتم استغلالها من طرف مجموعة ديال المنظمات المشبوهة، اللي كيخبعو فيها فلوسهم والمخدرات باش يحيدو عليهم الشبهة.

هادي كتعتابر ثاني أكبر عملية دارها البوليس فهولندا اللي حجز فيها 5مليون أورو كيشتبه فكونها من عائدات تجارة المخدرات، كيفما سبق ليهم لقاو مبلغ ضخم فهاد العام.