كود – I24 news//

كتواجه مربّية دزايرية المحكمة اليوم تلات ففرنسا، حيث متهمة بأنها سممّات عائلة يهودية كانت خدامة عندها فشهر يناير 2024، الأم ديال العائلة شكّات ملي لقات ريحة ديال مواد التنظيف فالشراب، وريحة ديال “جافيل” فالعصير، وزاد تأكد الشك ملي الماكياج ولّى كايحرق ليها عينيها، من بعد هادشي مشات ديكلارات وقدمات شكاية.

التحقيقات لقات آثار ديال مواد تنظيف سامة فالقراعي ديال الشراب، فالعصير، وحتى فالماكلة، وزيد عليها بعض مستحضرات التجميل، منين واجهو المربّية، اعترفات بأنها دارت مواد التنظيف فهاذ المنتوجات، ولّي صدم الجميع هو أنها قالت للمحققين: “عندهم الفلوس والنفوذ، وما كانش خاصني نخدم عند مرا يهودية”. هاد الجملة خلات القاضي يزيد تهمة معاداة السامية.

المحامين ديال العائلة قالو بأن الأطفال حتى هما كانو معرضين للخطر حيث كانو كيتلاقاو مع المربّية كل نهار، وقالو بأنهم شافوها كتشير بيدها للعلامة الدينية اللي معلّقينها فباب الدار “الميموزة” وكتسولهم بزاف على ديانتهم، المربّية من جهتها قالت إنها ما كانتش ناوية تضرّ الأطفال، وأنها كانت غير “كتعاقب” والديهم حسب كلامها.

القضية دخلات فيها جمعيات يهودية كأطراف مدنية، ومن المقرر يشهد حتى رئيس المجلس التمثيلي للمؤسسات اليهودية ففرنسا. الملف رجّع نقاش كبير فالإعلام الفرنسي بسبب حساسيتو.