وكالات//

شدّات السلطات الأمريكية واحد الجندي سابق سميتو “راسل ماكسويل فاي”، عندو 43 عام، من بعد ما توجهات ليه تهم ديال محاولة القتل، والاختطاف، والاعتداء على مرا مسنّة ف دارها فكاليفورنيا.

وحسب التحقيقات، فاي دخل بالقوة لدار تاي وارنر، مؤسس لعبة “بيني بيبيز”، وكان كيدّعي باللي المغنية المعروفة كاتي بيري هي اللي “أمراتو” يدير هاد الهجوم عبر ما سماه ’’صلة نفسية”. وكان معتقد باللي الدار ديالها، وباللي المرا اللي هاجمها هي الأم ديالها وكتتعرض لسوء المعاملة.

وكيبيّن واحد الفيديو صادم ديال الحادث، فاي وهو كايضرب المرا بزاف المرات، ومن بعد جرّها ورماها فواحد البركة ديال الماء، حسب تقرير جريدة Santa Barbara Independent.

ومن بعدما تشدّ، حاول فاي يهرب من شرجم ديال حمّام فالطابق الثاني، ولكن شدّاتو الشرطة بمساعدة فرق خاصة، وتدار للحجز.

ووضحوا المحققين باللي فاي كيعاني من مرض انفصام الشخصية، وأن العائلة ديالو كانت من قبل حاولات تحذّر السلطات من السلوك الخطير ديالو. وكشفت التحقيقات حتى أنه قبل أيام اعتدى على مرا أخرى سميتها إلين جينسن، من بعد ما دخل لدارها وهاجمها، وكيقول باللي هي تعدّات على “الحق الأساسي ديالو فالماء”.