وكالات//

البوليس ديال ميريكان شدو المغني والمنتج الموسيقى “آكون” فولاية جورجيا، من بعد ما لقاو مذكرة توقيف صادرة في حقو حيت ما مشاش للمحكمة بسبب “رخصة السياقة اللي كانت موقوفة”، حسب الوثائق اللي حصل عليهم موقع TMZ المعروف بأخبار المشاهير.

القضية راجعة لشهر شتنبر 2024، ملي لقات الشرطة الفنان السنغالي الأصل، اللي عندو 51 عام، واسمو الحقيقي أليون تيام، واقف وسط الطريق فـ طوموبيلتو من نوع “تيسلا سايبرترك”. وقال ليهم آكون بلّي الباتري سالا، وهادشي خلاهم يعايطو على ديباناج باش تعاونهم.

وخلال التوقف، اكتشفو البوليس أن رخصة السياقة ديالو موقوفة من يناير 2023 حيت ما مشاش للمحكمة، فدارو ليه مخالفة على القيادة برخصة موقوفة، وخلاوه يمشي من تماك.

وزاد التقرير وقال إن البوليس لقاو حتى سيجارة إلكترونية ممنوعة فوسط السيارة، وصادروها.