وكالات//

علنو البوليس ديال مومباي أنه شدو راجل وامرأة حاولو يتسللو لدار نجم بوليوود سلمان خان فـ شقق “جالاكسي” فمنطقة باندرا، فـ جوج ديال الحوادث اللي وقعات نهار الثلاثاء والأربعاء ديال هاد السيمانة.

و فبلاغ ديال البوليس، قالو أن الراجل، اللي سميتو جيتندرا كومار سينغ وعندو 23 عام، والمرأة، إيشا تشابرا وعندها 32 عام، حاولو يوصلو لسلمان خان بلا ما يكون عندهم شي ترخيص، وهادشي خلا البوليس يسجلو عليهم قضايا ديال التسلل والتعدي على ملك الغير.

فأول محاولة، تشاف سينغ كيدور حدا الدار صباح الثلاثاء، وملي نبهاتو السيكوريتي باش يمشي، تصرّف بعنف وهرّس التيليفون ديالو.

وفي العشية، تسلل لداخل العمارة من ورا واحد الطوموبيل، ولكن تشد وتسلم لمركز شرطة باندرا. وفعملية التحقيق، قال أنه كان باغي يشوف سلمان خان، وملي ما خلوهش، قرر يدخل خلسة.

أما تشابرا، فحاولات تدخل مع 4 دالصباح ديال الأربعاء، وقدرات توصل للمصعد، ولكن شدّوها رجال الأمن.

وهاد الأحداث جاو فوسط الأجواء الأمنية المشددة اللي دايزة بها سلمان خان فهذ السنوات، خصوصاً من بعد إطلاق النار اللي وقع حدا دارو فـ أبريل العام اللي فات، واللي تبين من بعد أن الناس اللي داروه تابعين لعصابة لورانس بيشنوي.