وكالات//

علنو البوليس ديال الصبليون نهار الجمعة، أنهم فكّو شبكة دولية كانت كتخدم فتهريب أكسيد النيتروس اللي معروف باسم “غاز الضحك”، وزيد عليه حتى السجائر المهربة.

وحسب البلاغ اللي نقلاتو وكالة “فرانس برس”، البوليس صادرو أكثر من 5,000 لتر من غاز الضحك من واحد المخزن ومن دار ديال مول الشاحنات اللي كان كيتهموه بأنه هو اللي كيسير النقل ديال السلع المهربة فإقليم ملقا فجنوب إسبانيا.

وزيد على هاد الشي، البوليس شدّو أكثر من 2.5 مليون سيجارة مهربة فواحد الشاحنة فإقليم أليكانتي فشرق البلاد، فوقت ما كانو أفراد الشبكة كيفرّغو الحمولة.

السلطات الإسبانية قالت بأن الشبكة كانت مكوّنة من أشخاص من إسبانيا ومن أوروبا الشرقية، وكانو كيدخلو الغاز والسجائر المهربة لفرنسا ودول أوروبية أخرى، تحت غطاء ديال شحنات قانونية. وتم القبض على سبعة أشخاص من الشبكة.

وأكسيد النيتروس كيتستعمل فالطب كمخدر خصوصاً عند أطباء الأسنان، ولكن فهاد السنين الأخيرة ولا بزاف ديال الشباب كيشموه باش يحسو بالانتشاء والضحك والارتخاء، بحال شي حالة ديال اللاوعي.

الأطباء كينبهو بأن الاستعمال الزايد ديالو كيقدر يضرب الجهاز العصبي، وحتى يسبب الموت إلى شمّوه بزاف.

وشحال ديال الدول الأوروبية دابا فرضو منع أو قوانين صارمة على استعمال هاد الغاز فالأغراض الترفيهية.