كود – سبتة//

كشفات وسائل إعلام إسبانية أن البوليس بمدينة سبتة فتح تحقيقً فشكاية كتهم تعرض قاصر لاعتداء جنسي، بعدما كانت وصلت للمدينة فموجة الدخول الجماعي للمهاجرين اللي عرفاتها سبتة نهار 30 و31 يوليوز الماضي.

وحسب المصادر نفسها، الضحية تنقلات لسبيطار الجامعي بسبتة وتلقات العلاجات اللازمة بسبب إصابات مرتبطة بالوقائع اللي صرحت بها، قبل ما تدير شكاية رسمية فاليوم نفسو ومن جهتها، أكدات الشرطة الإسبانية أنها فتحت تحقيق وباشرت جميع الإجراءات القانونية، مع الاحتفاظ بسرية تفاصيل الملف حفاظًا على سير الأبحاث.

وكتجي هاد القضية فواحد الظرفية الصعيبة اللي كتعيشها سبتة، بعدما استقبلات المدينة آلاف القاصرين، وكتشير المعطيات بلي 4 لاف منهم كاينين وسط المدينة، وخا أن مراكز الإيواء ما قادراش تستوعب غير جزء منهم، الشي لي خلا السلطات تهيئ فضاءات مؤقتة، بينما يلتحق أغلبهم بالمقاطعات الإسبانية لي رحبات بهم باستثناء المناطق لي كتحكمها أحزاب اليمين.