الوالي الزاز -كود- العيون///
زجت جبهة البوليساريو بنفسها فالحكم اللي صدرات محكمة العدل الدولية بخصوص الإلتماس اللي قدماتو جنوب إفريقيا ضد إسرائيل بسباب الانتهاكات الجسيمة والعنف فغزة.
البوليساريو خشات راسها فهاد الملف من خلال بيان صدراتو، وهاد البيان كان عندو جوج أهداف واضحة، الأول هو أنها كتقول لجنوب أفريقيا بللي واقفة معاها والبوليساريو براسها خاصها اللي يوقف معاها، والهدف الثاني هو الاستغلال السياسي.
البوليساريو عارفة بأن أنظار العالم كلها موجهة لمحكمة العدل الدولية وعارفة أن الإعلام الدولي كلو كيتناول هاد القضية، داكشي علاش بغات تستاغل الأمر ديال محكمة العدل الدولية باش تركب على الموجة وتبان كأنها مساندة للشعب الفلسطيني وتروج لسميتها وتستعمل القضية الفلسطينية مطية باش تكسب التعاطف سوا ديال الفلسطينيين أو العرب.
البوليساريو وقيادتها أيضا، عندهم سجل كبير فمجال القتل والاعتقال خارج إطار القانون والاختفاء القسري، وهادشي كيشهد عليه ضحايا صحراويين وموريتانيين وإسبان تعرضوا لمختلف أصناف التعذيب والموت وفيهم اللي مازال مفقود إلى غاية اليوم، وعائلتو مازال كتقلب عليه، وهادشي أيضا باعتراف قيادات طلبات المسامحة من الضحايا.
