الوالي الزاز -كود- العيون////

[email protected]

داير وفد فيه جوج برلمانيين أوروبيين زيارة لمخيمات تندوف فسياق الحملة اللي كدير البوليساريو باش تروج لراسها، لاسيما بعد التحذيرات الأوروبية الأمريكية الأخيرة لمواطنيها بخصوص خطر الإرهاب فالمخيمات وتوجيه مواطنيهم لعدم زيارتها.

واستقبل زعيم البوليساريو، إبراهيم غالي، الوفد الأوروبي المكون من مايك لاص وكلار دالي، وهدرو على نزاع الصحرا انطلاقا من زاوية معالجة ديال البوليساريو اللي فيها الترويج لـ “الحرب” فالمنطقة، وكذا لسوداوية وضعية حقوق الإنسان فالأقاليم الجنوبية للمملكة، فضلا عن تطورات الوضع القانوني ديال مسألة الشراكات بين الاتحاد الأوروبي والمغرب واللي كتشمل الصحرا.

وبحثو الجانبان أيضا، مسألة المساعدات الإنسانية الموجهة لساكنة مخيمات تندوف، والحاجة ليها فهاد الوقت بالنظر للنقص الحاصل فيها وعدم التزام الدول المانحة بالحصص اللي خصصات لساكنة المخيمات واللي كتوصلهم عبر هياكل الأمم المتحدة حصرا، بحيث طلب زعيم البوليساريو من الوفد الأوروبي المساهمة فالتخفيف من حدة هاد النقص الحاصل عبر تسيير قوافل إنسانية من طرف الجمعيات، واللي الغرض منها فقط هو التمهيد لاختلاسها بالنظر لكونها غير موجهة من هياكل الأمم المتحدة.

ويشار أن كلا من الولايات المتحدة الأمريكية والصبليون وبريطانيا كانوا حذروا مواطنيهم من زيارة مخيمات تندوف أو المشاركة فماراطون الصحراء اللي كتنظمو البوليساريو خوفا من التهديدات الإرهابية المحتملة.