الوالي الزاز -كود- العيون ///

[email protected]

زجت جبهة البوليساريو بمناصريها للقيام بأعمال بلطجة تزامنا وانعقاد منتدى المغرب -إسبانيا المنظم من طرف سفارة المملكة في إسبانيا وغرفة التجارة بمدريد، فالعاصمة الإسبانية مدريد، البارح الثلاثاء الموافق لتاريخ 16 أبريل 2024.

وتجمع عدد من مناصري البوليساريو قدام مكان انعقاد المنتدى اللي كيحضروه منتخبين من الأقاليم الجنوبية للمملكة، ورددوا شعارات معادية للوحدة الترابية للمملكة فالوقت اللي الأمن الإسباني كان داير الإجراءات ديالو.

بلطجة مناصري البوليساريو استامرات لدى وصول الوفود الرسمية، بحيث ناضو كيرددوا شعارات مناوئة للمغرب وللسيادة المغربية على الصحرا فاش وصلات سفيرة المملكة المغربية لدى إسبانيا كريمة بنيعيش، اللي ما تسوقاتش لهاد الاستفزازات.

البوليساريو دائما ما تلجأ لبحال هاد النوع ديال البلطجة فمحاولة للتشويش على العلاقات الثنائية المغربية الإسبانية والدعم الإسباني لمبادرة الحكم الذاتي كأساس وحيد لتسوية ملف الصحراء، بعد فشلها فمواكبة هاد التفوق الدبلوماسي المغربي وانتصاراتها فيما يخص القضية الوطنية.

ويشار أن هاد المنتدى كيشجع الشركات والمستثمرين الإسبان على الاستثمار فجهة الداخلة وادي الذهب اللي عندها بزاف ديال المؤهلات الاقتصادية والطاقية والتجارية والفلاحية والسياحية، والمشاركة فالتنمية اللي كيقودها الملك فالأقاليم الجنوبية.