كود سبور//

فرگع الموقع الأمريكي 3 Wire Sports، اللي مدير ديالو هو الصحافي الرياضي آلان أبراهامسون، معلومات جديدة بخصوص جنس البوكسورة الجزائرية المثيرة للجدل إيمان خليف، واللي موجهة لها اتهامات على انها رجل او متحول جنسي متحايل باش يلعب الملاكمة مع العيالات.

وكشف الموقع الميريكاني المذكور، فالملاكمة الجزائرية عندها كروموسومات ذكورية، وهذا الشي بينو اختبار خضعت له فالهند خلال بطولة العالم للملاكمة عام 2023.

وان هذا الاختبار، اللي تم الكشف على النتائج ديالو جزئيا لأول مرة، فإيمان خليف عندها كروموسومات نووية ذكورية، مع علامة “XY” ديال الذكور وماشي  “XX” الخاصة للإناث.

وحسب نفس الموقع فهذا الاختبار تدار فمختبر بنيو دلهي فالهند، بناء على طلب الاتحاد الدولي للملاكمة IBA، تحت إشراف الروسي عمر كريمليف، وهذا الشي تسبب فاستبعاد الجزائرية من بطولة العالم 2023، بحال التايوانية يو تينگ لين.

ودابا قرر الاتحاد الدولي للملاكمة فرض اختبار جديد لتحديد نوع الجنس على البوكسورة الجزائرية إيمان خليف اللي ربحت ذهبية اولمبياد باريس 2024، مقابل انها تلعب فالبطولات مستقبلا.