كود -وكالات//

كاينة واحد المعلومة اللي كتعاود ترجع كل مرة فالسوشيال ميديا، الراجل اللي كيبوس مرتو قبل ما يخرج للخدمة كيعيش، فالمتوسط 5 سنين كثر من الراجل اللي ما كيديرش هاد العادة، وزيد عليها كيكون دخلو أعلى بنسبة بين 20 و35 فالمية.

هاد الادعاء كيرجع لدراسة ألمانية قديمة كيتقال إنها دارت فالثمانينيات، وتنسبات لعالم النفس الألماني آرثر زابو، وكيتقال أنها تنشرت فمجلة ألمانية سميتها”Selecta”.

وحسب الرواية المتداولة، الدراسة ربطات بين بوسان المدام فالصباح وبين الصحة، وتمناك الخدمة وحتى النجاح المهني.

كما كيتقال بلي عينة من 110 مدير صناعي ألماني بينات أن نسبة كبيرة من الرجال اللي كيبوسو عيالاتهم قبل مايمشيو للخدمة طلع ليهم الصالير.

هاد الدراسة القديمة ما عندهاش توثيق علمي كافي باش نعتابرو النتائج ديالها حقيقة ثابتة وما كايناش، حسب المصادر اللي كتراجع هاد القصة، منهجية بحث مفصلة ولا نشر أكاديمي محكّم ولا إعادة تجربة مستقلة كتأكد هاد النتائج.

ولكن العلاقة الزوجية المزيانة والدعم العاطفي بين الزوجين عندهم ارتباط بالصحة النفسية والإحساس بالراحة، والبوسة ممكن تكون غير تعبير بسيط على هاد العلاقة لي ممكن تنعكس إيجابيا على المسيرة المهنية وبالتالى يقدر يطلع الصالير وتحسن جودة العيش وبالتالي يطوال العمر.