كود هناء ابو علي ///

التحقيقات اللي كيديرها الفرقة الوطنية من ليلة الثلاث اللي فات مع جوجت مدراء مواقع اخبارية فكازا ومع شي وحدين اخرين على خلفية شكاية قدمها الطرمباطي الملياردير اللي طاح بيه السقف مؤخرا٬ غادية وتشبك.

القضية وفق ما علمته “كود” مافيهاش غير ابتزاز بين هادو اللي كيقدمو راسهم صحافيين وقلبوها تبزنيز. اييه جوج فيهم عندهم بطاقة الصحافة ديال المجلس الوطني. عندهم حقاش ما كانتش عندهم سوابق واخا واحد فيهم عندو شكايات كثيرة.

هاد الملف تجبدو فيه امنيين. تجبدو فيه قضاة. تجبدو فيه رجال اعمال.

نرجعو شوية. موقع من هادو اللي شادينو معروف فكازا. كان كيخلع كلشي. سب قاضي مول الميني وكتب عليه. القاضي عوض ما يقدم بيه شكاية رسل ليه صاحبو يتوسط ليه باش يحيد المقال. هاد مول الميني راه كان صاحب مدير هاد الموقع القانوني. شفتونا ما كنقولوش منتحل صفة. حقاش عندو بطاقة الصحافة. عندو موقع كينشر فيه اخبارو. يعني عندو الملاءمة من السلطات القضائية.

هاد مول الموقع اللي كان مع وحدين اخرين٬ كتب على بزافت القضاة وما عمر النيابة العامة حركات ضدو شي قضية. عقلتو على الصحافي عمر الراضي اللي دار تدوينة على احكام الريف الدولة كلها ناضت ليه. تشد قبل ما يتابع فحالة سراح وقبل ما تبان قضية اخرى ليه.

القضاة دابا عايشين صراعات بين نادي القضاة والودادية. مضاربة كبيرة خاصة مع قرب انتخابات المجلس الاعلى للسلطة القضائية. هاد الحروب بانت فاعلام قريب منهم. كل واحد تكى على جهة وبدا يصفي حساباتو مع الجهة الاخرى. ضاربو القضاة وضاع القضاء ومعاه دولة الحق والقانون

دابا هادا ما سبش غير القضاة. كتب باللي اندري ازولاي مستشار محمد السادس راه انفصالي باللي التراب مصطفى المدير العام للمكتب المديري للفوسفاط. تجبدو بزاف بزاف بزاف. هادو رجالات الدولة. علاش النيابة العامة ما فتحاتش تحقيق فهاد الموضوع.

كاينين رجال اعمال وقع التشهير بيهم. كاين فيهم فاسدين وكاينين اللا. هادو فيهم اللي قدم شكاية لواحد من هاد المدراء وما تحرك والو.

حتي الامنيين وقع التشهير بيهم. كتبو عليهم حوايج كثيرة. ايلى كان اللي تكتب صحيح كان خاص ادارتهم تحاكمهم ولا كان داك الشي ابتزاز كان خاص النيابة العامة تتحرك. وما تحركاتش

يعني هادو شكون كان كيحميهم. شي دار شبكة علاقات باسم الزاوية البودشيشية. اييه زاوية صوفية مشاو ليها باش يوسعو علاقاتهم. دابا راهم متهمين بالنصب.

دابا خاص الهيئة الوطنية لمحاربة الرشوة تدخل فالخط. باش تزيد تفهم الرشوة فالمغرب جاب ليها الله هاد الشبكة. مجموع فيها كلشي.