كود هند لكلاوي مراكش ///

هاد ليام كاين المهرجان الوطني للفيلم بمدينة طنجة. افلام متنوعة تعكس تجارب مختلفة لسينمانا. نقاشات مزيانة. كلشي على السينما. ما سمعناش مشاكل كيف عاشها هاد المهرجان ايام كان صارم الفاسي الفهري مديرا للمركز السينمائي المغربي. هاد الشي ماشي صدفة. كاين مسؤول ما كيعجبوش الضو كيخدم بالسكات. هاد المسؤول هو عبد العزيز البوجدايني اللي ماشي حتى مدير للمركز السينمائي المغربي بل غير مدير بالنيابة. يمكن هادي اول مرة كيتفوق مدير بالنيابة على المدير اللي كان. متواضع. كيفهم فالقطاع. رجل الحوار. رجع لرجالات المركز السينمائي قيمتهم وهيبتهم.

قطاع السينما عاش تقاطعات فعهد الفاسي الفهري اللي جابوه الاسلاميين. بدات صراعات كبيرة من سينمائيينا. هاد الشرخ قدر يعالجو البوجدايني. رجل دولة. رجل كيخدم بهدف واحد هو خدمة السينما المغربية ماشي مصالح هادو ضد لخراين.

ايلى المهرجان دايز مزيان هاد العام كيف العام اللي فات. ايلى السينمائيون لمغاربة كيخدمو السينما كل انطلاقا من توجهاته فهادا بسباب تدبير المركز السينمائي المغربي فهاد المرحلة.

البوجدايني ماشي غير مسؤول على المركز السينمائي المغربي بل عندو كاسكيط اخرى ماشي ساهلة وهي “مدير عام لقطاع الاتصال بوزارة الاتصال. غير هادا بوحدو راه ورش كبير بزاف بزاف. 

قدر البوجدايني يجمع بيناتهم. هاد الشي كيدل باللي الادارة المغربية عندها رجالاتها. بها تتقوى. هادو السياسيين الانتهازيين اللي كيحاولو يجيبو ناسهم لتحقيق مصالح شخصية كيلقاو امثال البوجدايني فادارات اخرى. هما الاستمرارية