كود سبور//
بداو الوداد الرياضي كيجدو للماتش الجاي ضد اتحاد التواركة، اللي غيتلعب السبت الجاي فتيران البشير فالمحمدية، ضمن الدورة 23 من البطولة الاحترافية لكرة القدم.
الوداد الرياضي صبحو اليوم الأربعاء، كيتدربو فتيران بنجلون فكازا تحت إشراف المدرب فوزي البنزرتي، واللي دار معهم اجتماع قبل الحصة التدريبية باش ينبههم للأخطاء اللي كيديرو ويعالجها معهم، خصوصا بعد الماتش اللي دارو البارح ضد نهضة الزمامرة واللي سالا تعادل زيرو لزيرو ضمن مؤجل الدورة 20، وكانت عند البنزرتي مؤاخذات كثيرة على اللاعبين بسبب تضييع فرص التسجيل فالمباراة.
الحصة التدريبية ديال الوداد الرياضي اليوم الاربعاء، مشاركين فيها گاع اللاعبين باستثناء اللاعب منتصر الحتيمي اللي عندو إصابة، حيث كان توعت فالماتش ضد أسيك ميموزا الإيفواري السبت الماضي فشومبيونزليگ، وغاب بسببها على ماتش البارح ضد نهضة الزمامرة.