كود سبور//

بدا التونسي فوزي البنزرتي المدرب الجديد للوداد الرياضي كيرتب الأمور داخل الفريق وكيصفي الخواطر، قبل ما يلعب أول ماتش له كمدرب ديال الحمرا، واللي غيكون الثلاثاء الجاي ضد سيمبا التنزاني.

واستغل فوزي البنزرتي تواجد لاعبين الوداد الرياضي مجموعين فالعاصمة التنزانية دار السلام، استعدادا لمواجهة سيمبا التنزاني ضمن الجولة 4 من دور مجموعات دوري أبطال إفريقيا، باش يجمع الشمل داخل الفريق ويقوي الكروب.

وحسب مصادر مطلعة، دار البنزرتي اجتماع مع عدد من اللاعبين اللي عندهم الوزن ديالهم فالفريق من بينهم الكابيتان يحيى جبران ويحيى عطية الله، باش يوصل من خلالهم ميساج للكروب كامل على أن هادي مرحلة جديدة وداكشي اللي كان قبل منو فات ومات، والمطلوب دابا هو جميع اللاعبين يتعاونو لمصلحة الوداد باش الفريق ينجح.