وكالات //

شينوي داير البوز فمواقع التواصل الاجتماعي بعدما كمل 14 لعام وهو عايش فالمطار، من نهار هرب من عائلتو اللي صدعاتو باش يقطع الكَارو والشراب.

الراجل اللي فالستينيات من عمرو كيف قالت جريدة “The Daily Mail” البريطانية مشا هرب وعاش وسط المطار باش يكمي ويشرب كيف بغا ليه الخاطر ديالو بلا صداع ونكَير عائلتو.

وي جيانكَو، قال أنه ماقاد بلاصة فقاعة الانتظار، ما كيدير صداع ما كيهضر مع حد، كياكل ويشرب وينعس، ويكمي ويسكر وكيصرف من الإعانة اللي كتعطيها ليه الدولة.

الرجل الشينوي قال أنه مستحيل  يرجع لدارو، لأنه إيلا رجع غادي يضطر باش يقطع الكَارو والشراب، وهادشي اللي صعيب عليه، حسب كلامو.

المسؤولين فالمطار قالو أنه أكثر من مرة كيخرجوه وكيسكر وكيرجع، وما كيدير لا صداع لا والو، لذلك كيخليوه طرونكيل، خصوصاً أنه أيضا كيهرب من درجة الحرارة النازلة بزاف والسميقلي فمقاطعة شوني فالصين.