كود -وكالات//

واحد الظاهرة لي ولات منتشرة بزاف فالعالم ديال الكرة، وسط لعابة كبار فالدوريات الأوروبية وهي ديال “غاز الضحك” ، أكسيد النيتروز، اللي فاللول كيبان غير كمادة كتسبب الضحك والنشاط  وفالحقيقة عندو تأثيرات خطيرة على الصحة.

وحسب التحقيقات كاينين ريزويات فمدن بحال ميلانو كيوفرو عروض كلاص للاعبين، فيهم سهرات، مرافقات، وحتى هاد الغاز، المشكلة أن بعض اللاعبين ولاو مدمنينن عليه الشي لي يقدر يدمر لهم الجهاز العصبي ويأثر على الأعصاب والحركة وحتى الأداء الرياضي.

التقارير كتقول إن بعض الأندية بدات كدير فحوصات خاصة باش تشوف واش كاين استعمال هاد المادة، حيث لاحظو تراجع فالصحة البدنية ديال بعض اللاعبين مقارنة مع الأداء المتوقع منهم. كاين حتى حالات ديال لاعبين ترفضات صفقات انتقال ديالهم من بعد ما تبين أنهم تعرضو لأضرار عصبية.

الأطباء كينبهو أن هاد الغاز كيقدر ينقص فيتامين B12 فالجسم، وهاد الشي خطير على الأعصاب، وخا أن بزاف كيشوفوه “غير ضار”، ولكن الاستعمال ديالو بزاف كيقدر يسبب مشاكل كبيرة بحال فقدان التوازن، صداع، وحتى اختناق فبعض الحالات.

ومن أشهر اللاعبين لي تجبدات سمياتهم تقارير إعلامية بخصوص هاد الموضوع هنا ديلي آلي، جاك غريليش، كايل ووكر ورحيم ستيرلينغ وكاين منهم لي كيتبعو مع مختصين ديال الادمان باش يتعافاو من هاد البلية.