كود سبور//

بحالو بحال بزاف من المدربين اللي خدمو فالجزائر، اعتبر البلجيكي هوگو بروس المدرب الحالي لجنوب افريقيا، (اعتبر) التجربة ديالو بالعمل فالجزائر هي أسوء تجربة بالنسبة له كمدرب.

وهضر هوگو بروس، مول 72 عام خلال برنامج حواري مع قناة canal+ الفرنسية، وتكلم على التجربة ديالو فالجزائر وقال: “بالنسبة ليا اكبر خطأ درت فحياتي هو مشيت للجزائر”.

وكمل المدرب البلجيكي، وقال: “العقلية فالجزائر ما زويناش نهائيا، وكانو عندي بزاف ديال المشاكل تما، خدمت فالجزائر 2 مرات مع 2 فرق، دوزت مع الفريق الاول 4 اشهر ومع الفريق الثاني 3 اشهر وكانت أسوء تجاربي هي فالجزائر”.

وللإشارة فالبلجيكي هوگو بروس اللي درب فالجزائر كل من شبيبة القبايل ونصر حسين داي، ماشي اول مدرب غايتشكى من الخدمة فالجزائر، عدد من المدربين سوا أجانب او مدربين جزائريين ديما كانوا كايتشكاو من العمل فالجزائر، ومن بينهم الناخب الجزائر السابق اللي كان خدام فظروف صعيبة.