الوالي الزاز -كود- العيون//
عقدات الأمانة العامة ديال جبهة البوليساريو اجتماع ليها ناقشات فيه الوضع فالصحرا والمستجدات السياسية والميدانية فظل الخسائر الكبيرة التي تتكبدها شرق الجدار الرملي.
وعلى غرار گاع البيانات ديال مكتب الأمانة العامة ديال البوليساريو، هاجمات المغرب واتاهماتو بأنه مسؤول على “خرق اتفاق وقف إطلاق النار” فالوقت اللي هي تنصلات منو ودارت عمليات إرهابية وكتستفز القوات المسلحة الملكية المغربية شرق الجدار.
وفنفس السياق البكا والشكا، هاجمات البوليساريو الأمم المتحدة وحملاتها المسؤولية وطالباتها بتمكين بعثة الأمم المتحدة في الصحراء “مينورسو” من تأدية مهامها، علما بأن جبهة البوليساريو نفسها تعرقل عمل عناصر البعثة من خلال منعهم من التنقل والتمويل، الشي اللي خلى المبعوث الشخصي ستافان دي ميستورا يدخل على الخط العام اللي فات ويؤمّن قوافل التموين لعناصر البعثة.
وكملات البوليساريو بيانها بمهاجمة إسبانيا وموقفها الداعم لمبادرة الحكم الذاتي كأساس وحيد لتسوية ملف الصحراء واللي اعتامداتو حكومة بيدرو سانشيث، وطالبات الاتحاد الأوروبي باش ما يوقعش أي اتفاقية تجارية مع المغرب بشكل يشمل الصحرا.