كود سبور//

قربو نهضة بركان من التتويج بلقب البطولة الاحترافية لأول مرة فتاريخهم، بعدما ربحو اليوم الاحد فريق المغرب التطواني فتيران سانية الرمل فتطوان برسم الدورة 24.

وسالا الماتش بين نهضة بركان والمغرب التطواني، اللي عرفت الانطلاقة ديالو تضامن مع الطفلة يسرى اللي غرقت فقناة الصرف الصحي قبل أيام فبركان، و(سالا) الماتش بنتيجة 2 لزيرو لمصلحة الفريق البركاني، وماركا لهم الهدفين كل من أسامة المليوي فالدقيقة 56، وياسين البحيري فالدقيقة 69.

وبهذا الرباح خداو نهضة بركان 3 نقاط مهمة عزز بها الفريق الرصيد ديالو اللي ولى 59 نقطة، وخاصهم غير رباح واحد من 6 الماتشات اللي مازالين فالبطولة باش يربحو اللقب، أما المغرب التطواني غرقو فالمركز قبل الأخير وعندهم 15 نقطة، والمهمة ديالهم فالبقاء فالقسم الأول صعيبة.