كود سبور//

تصدرو نهضة بركان البطولة الاحترافية لكرة القدم وخداوها بوحدهم، بعدما ربحو اليوم الأحد فبركان، فريق يوسفية برشيد ضمن الدورة 6.

وربحو نهضة بركان يوسفية برشيد بنتيجة 3 لواحد، ماركاهم لهم كل من لامين كامارا فالدقيقة 13، ومحمد المورابيط فالدقيقة 51، وأسامة المليوي فالدقيقة 70، أما الهدف الوحيد ديال أولاد حريز ماركاه لهم صالح السالمي فالدقيقة 76.

الرباح ديال نهضة بركان عطاهم 3 بوان جديدة، وخلاهم ينفردوا بصدارة البطولة الاحترافية برصيد 14 نقطة على بعد نقطة واحدة من الوداد الرياضي الثاني فالترتيب، أما يوسفية برشيد بداو كيفونديو والفريق عندو غير نقطة واحدة فالمركز الأخير.

وفنفس التوقيت وعن نفس الدورة، قدر فريق نهضة الزمامرة يربح الضيف الديالو أولمبيك اسفي فديربي دكالة عبدة، اللي عرف أهداف كثيرة.

الزمامرة قدرو يربحو أولمبيك آسفي بنتيجة 3 لجوج، وطلعو للمركز 9 برصيد 7 النقاط، ووصلو على أولمبيك اسفي اللي عندهم نفس الرصيد من النقاط.