كود سبور//

هربو الجيش الملكي بالمركز الثاني على الوداد الرياضي، بعدما ربحو شباب السوالم، والوداد تعادلو مع اولمبيك اسفي.

وربحو الجيش الملكي فريق شباب السوالم، اليوم الاربعاء فتيران القنيطرة برسم الدورة 27 من البطولة، بنتيجة 2 لززيرو، وخداو 3 نقاط، عزز بها الفريق العسكري المركز الثاني برصيد 51 نقطة.

وعن نفس الدورة ونفس الوقت، تعادلو الوداد الرياضي مع أولمبيك اسفي فتيران المسيرة الخضرا فآسفي، بنتيجة واحد لواحد، وخداو نقطة واحدة عزز بها الفريق الأحمر الرصيد ديالو اللي ولى 45 نقطة، ومحتلين المركز الثالث مع العلم ان الماتش عرف احتجاج جمهور الوداد على رئيس الوداد هشام ايت منا بسبب الوضع اللي كايدوز منو الفريق هذا الموسم والخروج بزيرو لقب والوعود اللي كان كايقول قبل ما يطلع رئيس للنادي، وطلعو ميساج قالو فيه: “ماشي منا اللي يحقق لغيرنا شنو كيتمنى”.