كود سبور//

تعتقو الرجاء الرياضي من خسارة كانت بين عينهم أمام اتحاد طنجة، اليوم الخميس بملعب العربي الزاولي بالدار البيضاء، ضمن مؤجل الجولة 17.

وسالا الماتش بين الرجاء الرياضي والضيوف ديالهم اتحاد طنجة بنتيجة التعادل واحد لواحد بين الفريقين لمصلحة الطنجاويين، وسالا الشوط الأول بنتيجة التعادل السلبي زيرو لزيرو بين الفريقين، وخلال الشوط الثاني وبعد تغييرات دارها مدرب طنجة هلال الطير من بينها أنه دخل الرجاوي السابق محسن متولي اللي كان ورا تمريرة الهدف ديال الطنجاويين اللي ماركاه زكرياء البقالي فالدقيقة 72، وسط غضب كبير من الرجاويين اللي عيرو رئيس النادي عادل هالا واللاعبين ديالهم بسبب المستوى اللي وصل له الفريق، وعايرو حتى محسن متولي اللي طلب المسامحة على تمريرة الهدف اللي عطى، وفي الوقت اللي كلشي كان كتيتسنى طنجة تخرج رابحة قدر عبد الكريم باعدي يعتق الرجا من الخسران وماركا هدف التعادل فالدقيقة الأخيرة.

وبهذا التعادل زاد تكفس وضع الرجاء الرياضي، والفريق يحتل المركز 8 مؤقتا برصيد 24 نقط، وبالمقابل طلعو اتحاد طنجة إلى المركز 9 برصيد 23 نقطة.