گود سبور//

مازال غاديين الوداد الرياضي فمسلسل النتائج السلبية، واخا بدلو المدرب امين بنهاشم ودارو بلاصتو الفرنسي باتريس كارتيرون، وهذه المرة خسرو مع الفتح الرياضي ضمن مؤجل الدورة 10 من البطولة الاحترافية، اليوم الجمعة فتيران مولاي الحسن فالرباط، وضيعو فرصة ياخدو الصدارة.

وسالا الماتش بين الوداد الرياضي والمضيف ديالو الفتح الرياضي، بنتيجة واحد لزيرو لمصلحة الفريق الرباطي، واللي قدر ماركي هدف الرباح فالدقيقة 63 بواسطة لامين دياكيتي، بالمقابل غابت الحلول على الوداد والمدرب باتريس كارتيرون واللاعبين د الحمرا كانو تالفين فالتيران، مع العلم ان الكابيتان ديال الحمرا حكيم زياش خرج فالدقيقة 42 حيث توعت وما قدرش يكمل الماتش ودخل بلاصتو نور الدين امرابط.

هذه الخسارة الجديدة ديال الوداد الرياضي بعد تغيير المدرب، كاتزيد تأكد ان المشكل كبر من المدرب وان القضية عندها علاقة بسوء التسيير وأخطاء ديال إدارة الوداد من اول الموسم، والرئيس هشام ايت منة اللي صبر بزاف على بقاء امين بنهاشم وحتى الانتدابات اللي كانت كاتبان غير من اجل الانتداب، اضافة إلى انه باع 2 ركائز مهمين وسط الموسم هما عزيز كي ولورش وهذا الشي ما كايديروش مسؤول باغي يلعب على الالقاب، والضحية هو الوداد من غير إلى وقعت شي حاجة استثنائية وتعالجت الأمور التقنية تدريجيا وانعكست على النتاج بشكل إيجابي.

الوداد الرياضي بهاد الخسارة ضيعو فرصة الانفراد بالصدارة، وبقاو فالمركز الثاني برصيد 29 نقطة، مع 2 ماتشات مؤجلين، أما الفتح الرياضي خداو من هذا الرباح 3 نقاط، رفعو بها رصيدهم إلى 18 نقطة ومحتلين المركز الثامن.