كود سبور- الرباط//

خطفو الوداد الرياضي رباح مثير من عند التواركة بريمنتادا واعرة أمس الاحد فتيران المدينة برسم الدورة 15 فالبطولة الاحترافية.

وسالا الماتش بين الوداد الرياضي والمضيف ديالو اتحاد التواركة بنتيجة 4-3 لمصلحة الفريق الأحمر، مع العلم أن الرباطيين سبقو 2 بيوتا متابعين على الحمرا، بواسطة كل من محمد الساهل فالدقيقة 14، ونصر الدين مستغفر فالدقيقة 16، قبل ما يماركيو الوداد الهدف الأول بواسطة وسام بنيدر فالدقيقة 42.

اتحاد التواركة رجعو لتعزيز تقدمهم فالنتيجة بهدف ثالث، وماركاه لهم فؤاد الزهواني فالدقيقة 55، والوداد رجعو حتى هما وماركاو الهدف الثاني قلصو به الفارق بكورة تيراها وليد الصبار فالدقيقة فالدقيقة 82، وحاولو الوداد يرجعو فالماتشات وضغطو ولكن الفرص ديالهم الخطيرة عرفت تألق الگول ديال التواركة والمدافعين ديالهم، قبل ما يخطف لهم وليد ناسي الهدف ديال التعادل فاللحظات الأخيرة من الماتش، وفالوقت اللي كان كلشي معول يسالي الماتش بالتعادل نجحو الوداد خطفو هدف الرباح بواسطة حمزة الهنوري.

هذا الرباح خداو به الوداد 3 نقاط رفع بها الفريق الرصيد ديالو إلى 29 نقطة بفارق نقطة على الصدارة مع 3 المؤجلات، ومحتل المركز الثاني والتواركة بقات عندم 12 نقطة ومحتلين المركز 14.